ស្ថានទូតអូស្រ្តាលី តែងតែប្រតិបត្តិការងារគ្រប់ពេលដើម្បីផ្តល់ជំនួយនានាដល់ពលរដ្ឋអូស្រ្តាលីនៅប្រទេសកម្ពុជាពិសេសក្នុងពេលមិនច្បាស់លាស់នេះ។ ជំនួយទាំងនោះ មានដូចជាការជួយពលរដ្ឋអូស្រ្តាលីដែលចង់ចាកចេញពីកម្ពុជា និងជំនួយផ្សេងទៀតសម្រាប់អ្នកដែលចង់បន្តនៅលើទឹកដីកម្ពុជា។ សកម្មភាពជំនួយនេះ រួមបញ្ចូលទាំងជំនួយផ្នែកព្រហ្មទណ្ឌ ប្រព័ន្ធយុត្តិធម៌ ពន្ធនាគារ ឬបញ្ហាសុខភាពផ្សេងៗដែលកំពុងកើតមាន។ តាមរយៈកម្មវិធីជំនួយរបស់ស្ថានទូត...អូស្ត្រាលី ក៏កំពុងជួយដល់រាជរដ្ឋាភិបាលកម្ពុជា វិស័យឯកជន និងអង្គការសង្គមស៊ីវិល ពាក់ព័ន្ធនឹងការគ្រប់គ្រងការឆ្លើយតបទៅនឹងជំងឺកូវីដ-១៩ ផងដែរ ។
ខណៈនេះ មានមធ្យោបាយតែមួយគត់ សម្រាប់ពលរដ្ឋអូស្ត្រាលីដែលត្រូវវិលត្រឡប់ទៅកាន់ប្រទេសកំណើតរបស់ខ្លួនវិញ៖ នោះគឺតាមរយៈជើងហោះហើរជាមួយក្រុមហ៊ុនអាជីវកម្ម(Commercial Flights)។ មន្ត្រីស្ថានទូត នឹងបន្តផ្តល់យោបល់នានាដល់ពលរដ្ឋអូស្រ្តាលី អំពីជម្រើសហោះហើរទាំងឡាយ អោយបានឆាប់តាមដែលអាចធ្វើបាន។ ក្នុងករណីខ្លះ ដោយសារកាលៈទេសៈហួសពីការគ្រប់គ្រងផ្ទាល់របស់យើង ពិសេសដូចជាការសម្រេចចិត្តដោយក្រុមហ៊ុនអាកាសចរណ៍ (Airlines) និងដោយរដ្ឋាភិបាលបរទេសណាមួយ ជម្រើសធ្វើដំណើរតាមយន្តហោះមួយចំនួន ក៏អាចនឹងផ្លាស់ប្តូរជាបន្តបន្ទាប់ដែរ។ ដើម្បីរក្សាមានតុល្យភាពក្នុងការសម្រេចចិត្ត យើងស៊ូផ្តល់ព័ត៌មានបន្ថែមឱ្យបានច្រើន ជាជាងការទទួលបានព័ត៌មានតិច។ យ៉ាងណាក្តី ពួកយើងទទួលស្គាល់ថា រាល់ការសម្រេច ឬជម្រើសណាមួយដែល យើងបានកំណត់ អាចនឹងមិនពេញចិត្តដល់មនុស្សគ្រប់គ្នាឡើយ។ ខណៈដែលដំបូន្មាន និងជម្រើសដែលយើងកំពុងផ្តល់ឲ្យ ទំនងជាមិនសូវសមរម្យសម្រាប់អ្នកដំណើរគ្រប់គ្នាក្តី តែវាអាចនឹងជាជម្រើសសមរម្យសម្រាប់អ្នកដំណើរផ្សេងទៀត។ អ្វីៗអាចមានសភាពខុសប្លែកគ្នាខ្លាំង ផ្អែកតាមកាលៈទេសៈបុគ្គល និងស្ថានភាពហិរញ្ញវត្ថុ។ អ្នកខ្លះអាចត្រូវបានលើកទឹកចិត្តឱ្យចាកចេញ ឯអ្នកខ្លះទៀតមានកាតព្វកិច្ចមិនអាចចេញទៅបាន។ យើងក៏នៅតែបន្តទាក់ទងជាមួយពលរដ្ឋអូស្រ្តាលីមួយចំនួនដែលបានហោះចេញពីកម្ពុជា ក្នុងរយៈពេលប៉ុន្មានថ្ងៃថ្មីៗនេះបន្ទាប់ពីអ្នកទាំងនោះទទួលយកដំបូន្មានពីយើង។
គឺជាការចាំបាច់មួយ សម្រាប់ពលរដ្ឋអូស្ត្រាលីដែលកំពុងស្នាក់នៅកម្ពុជា ហើយពុំអាចហោះទៅប្រទេសកំណើតរបស់ខ្លួនវិញបាន មិនថាដោយហេតុផលអ្វីឡើយ..ពលរដ្ឋទាំងនោះ ត្រូវត្រៀមខ្លួនឲ្យបានសមរម្យសម្រាប់ហេតុការណ៍នានា ដែលអាចតម្រូវឲ្យស្នាក់នៅក្នុងប្រទេសកម្ពុជា យូរជាងការកំណត់។ ក្រុមការងារស្ថានទូត នឹងបន្តផ្តល់ដំបូន្មានលើអ្វីដែលត្រូវធ្វើនៅក្នុងព្រឹត្តិការណ៍បែបនេះ។ យើងមិនគួរផ្អែកតែទៅលើផែនការដែលយើងគិតថាល្អឥតខ្ចោះនោះឡើយ ពិសេសផែនការធ្វើដំណើរទៅអូស្ត្រាលី ក្នុងកាលៈទេសៈដែលស្ទើតែគ្មានជម្រើសដូចបច្ចុប្បន្ននេះ។
ចំពោះពលរដ្ឋអូស្រ្តាលីដែលកំពុងរស់នៅក្នុងប្រទេសកម្ពុជា ហើយមានបំណងចង់ចុះឈ្មោះប្រាប់ពីវត្តមានរបស់ខ្លួន ឬថាចង់ចាកចេញពីកម្ពុជាទៅអូស្ត្រាលីវិញ សូមទាក់ទងស្ថានទូតដោយផ្ទាល់ តាមមធ្យោបាយដែលយើងបានផ្តល់ជូនកន្លងមក។
យើងបន្តស្វែងរកជម្រើសដែលមានទាំងអស់ដើម្បីផ្តល់ឲ្យពលរដ្ឋអូស្រ្តាលី អាចទៅដល់ប្រទេសកំណើតរបស់ខ្លួនបាន។ ស្ថានភាពបច្ចុប្បន្ន គឺជាអ្វីមិនធ្លាប់មានពីមុនមកក្នុងប្រវត្តិសាស្ត្រពិភពលោកនាសម័យទំនើបនេះ ពោលគឺទាំងទ្រង់ទ្រាយ និងភាពស្មុគស្មាញ។ មិនមានចម្លើយរហ័សឬងាយស្រួលណាមួយដែលអាចផ្តល់ជូនបានឡើយ។
ក្នុងកាលៈទេសៈនេះ សូមបន្តតាមដាន ពីបច្ចុប្បន្នភាពថ្មីៗបំផុត នៅលើទំព័រហ្វេសប៊ុក (Facebook) និង Twitter របស់ស្ថានទូត ។