ពលរដ្ឋអូស្រ្តាលី និងអ្នកមានសិទ្ធិស្នាក់នៅអូស្ត្រាលីអចិន្ត្រៃយ៍ ជាទីរាប់អាន!
ស្ថានទូតអូស្រ្តាលី បានឈានដល់ដំណាក់កាលចុងក្រោយនៃការចរចារជើងហោះហើរពិសេសមួយទៅកាន់អូស្រ្តាលី នៅល្ងាចថ្ងៃអាទិត្យទី ១២ ខែមេសាឆ្នាំ ២០២០នេះ។ ជើងហោះហើរមួយនេះនឹងត្រូវឈប់ដូរយន្តហោះក្នុងរយៈពេលខ្លីមួយ (short transit) នៅក្នុងប្រទេសជិត មុនពេល បន្តដំណើរទៅកាន់ទីក្រុងស៊ីដនី ដោយរំពឹងថានឹងទៅដល់នៅព្រឹកថ្ងៃច័ន្ទទី ១៣ ខែមេសាឆ្នាំ ២០២០។
ក្នុងអំឡុងពេល Transit នៅប្រទេសជិនខាង អ្នកដំណើរទាំងឡាយ តម្រូវឱ្យនៅលើយន្តហោះ ប្រមាណជា ២ ម៉ោងតាមការកំណត់របស់ប្រទេសនោះ។
ខណៈដែលកិច្ចព្រមព្រៀងពាណិជ្ជកម្មជាមួយនឹងក្រុមហ៊ុនហោះហើរ កំពុងឋិតក្នុងដំណាក់ការពិភាក្សា យើងនៅមិនទាន់អាចបង្ហាញពីអត្តសញ្ញាណ ក្រុមហ៊ុនអាកាសចរណ៍ឬព័ត៌មានលម្អិតអំពីការចេញដំណើរ/ការទៅដល់ជាក់លាក់បានឡើយ។ ប៉ុន្តែក្រុមការងារយើង ចង់ជូនដំណឹងនេះ ឱ្យបាន គ្រប់គ្រាន់ ដល់លោកអ្នកទុកជាមុន ដើម្បីត្រៀមខ្លួនសម្រាប់ឱកាសមួយនេះ ហើយក៏ជាឱកាសសម្រាប់យើងប្រមូលតួលេខ ដើម្បីទាក់ទងនឹងក្រុមហ៊ុនអាកាសចរណ៍មុនពេលចេញដំណើរ។ តម្លៃសំបុត្រមានចាប់ពីប្រហែល ៦៨២ ដុល្លារសម្រាប់កៅអីថ្នាក់សេដ្ឋកិច្ច (ធម្មតា) ១៦២២ ដុល្លារសម្រាប់ថ្នាក់ជំនួញ រហូតដល់ ៣៨៦៨ ដុល្លារកៅអីពិសេស។ តម្លៃទាំងនេះរាប់បញ្ចូលពន្ធទាំងអស់ដែលអាចប្រែប្រួលបន្តិចបន្តួចដោយសារអត្រាប្តូរប្រាក់។
ដោយអនុលោមតាមលក្ខខ័ណ្ឌកំណត់របស់រដ្ឋាភិបាលអូស្រ្តាលី អ្នកដំណើរទាំងអស់ ពេលទៅដល់អូស្ត្រាលី ត្រូវបានតម្រូវឱ្យនៅដាច់ដោយឡែកនៅក្នុង សណ្ឋាគារដែលបានកំណត់នៅទីក្រុងស៊ីដនី ក្នុងរយៈពេល ១៤ ថ្ងៃ។
ប្រសិនបើអ្នកចង់ទិញសំបុត្រយន្តហោះ សម្រាប់ជើងហោះហើរដូចបានជម្រាបខាងលើ សូមផ្ញើអ៊ីមែលមក([email protected]) ឱ្យបានកាន់តែលឿនតាមដែលអាចធ្វើទៅបាន នៅត្រឹមល្ងាចថ្ងៃព្រហស្បតិ៍ ទី៥ មេសានេះ (ចំណងជើងអ៊ីមែល៖ ស្នើសុំទិញសំបុត្រ) ដោយបន្ថែមព័ត៌មានទាំងឡាយខាងក្រោម៖
· ឈ្មោះពេញ របស់អ្នកធ្វើដំណើរ (ឈ្មោះដូចមាននៅក្នុងលិខិតឆ្លងដែន)
· ថ្ងៃ ខែ ឆ្នាំកំណើត របស់អ្នកធ្វើដំណើរ
· លេខលិខិតឆ្លងដែន របស់អ្នកធ្វើដំណើរ
· លេខទូរស័ព្ទទំនាក់ទំនង
· សញ្ជាតិ (ប្រសិនបើមិនមែនជាពលរដ្ឋអូស្ត្រាលី)
នៅពេលដែលជើងហោះហើរត្រូវបានបញ្ជាក់ មន្ត្រីផ្នែកលក់សំបុត្រយន្តហោះ នឹងទាក់ទងទៅអ្នកដើម្បីទូទាត់ដោយកាតឥណទាន (Credit Card )។ ដើម្បីរក្សាចំនួនកៅអីអ្នកជិះឱ្យបានច្រើននិងកាត់បន្ថយហានិភ័យ “អវត្តមាន” អ្នកធ្វើដំណើរ រាល់ការទូទាត់ថ្លៃចំណាយនេះ នឹងមិនអាចសងវិញ បានឡើយ (លើកលែងតែករណីដែលជើងហោះហើរត្រូវបានលុបចោល)។
សូមចង់ចាំថា៖ សំបុត្រយន្តហោះទៅអូស្ត្រាលីលើកនេះ គឺសម្រាប់តែពលរដ្ឋអូស្ត្រាលី អ្នកមានសិទ្ធិស្នាក់នៅអូស្ត្រាលីអចិន្ត្រៃយ៍ ឬសមាជិកគ្រួសារផ្ទាល់របស់អ្នកទាំងនេះ។ ប្រសិនបើអ្នកមានបំណងធ្វើដំណើរជាមួយសមាជិកគ្រួសារដែលមិនមែនជាពលរដ្ឋអូស្ត្រាលី សូមមើលព័ត៌មានសំខាន់ៗ ដែលសរសេរអក្សរទ្រេត ខាងក្រោម នៅចុងបញ្ចប់នៃសារមួយនេះ។
ពលរដ្ឋដែលកក់សំបុត្រយន្តហោះទុកមុន ឬមានបំណងចង់កក់សំបុត្រយន្តហោះ ហើយកំពុងស្នាក់នៅក្រៅក្រុងភ្នំពេញ
គួរតែប្តូរទីលំនៅមកភ្នំពេញជាបន្ទាន់។ ស្ថានទូតមិនអាចធានាឱ្យមានការចូលទៅកាន់ព្រលានយន្តហោះ បានឡើយសម្រាប់ពលរដ្ឋណាដែលនៅខាងក្រៅរាជធានីភ្នំពេញ ពិសេសក្នុងករណីដែលរាជរដ្ឋាភិបាលកម្ពុជាប្រកាសភាពអាសន្ន មុនថ្ងៃអាទិត្យដែលបានកំណត់ ដែលការប្រកាសនេះ អាចពាក់ព័ន្ធនឹងការរឹតត្បិតចលនាទាំងឡាយនៅក្នុងប្រទេសកម្ពុជា។ អ្នកដំណើរទាំងអស់នៅលើយន្ដហោះនេះនឹងត្រូវទទួលការពិនិត្យសុខភាពរួមទាំងការវាស់សីតុណ្ហភាពផងដែរមុនពេលឡើងយន្តហោះ។ ការត្រួតពិនិត្យសុខភាពនេះ គឺជាលក្ខខណ្ឌកំណត់ទុកមុន សម្រាប់ការធ្វើដំណើរ។
យើងលើកទឹកចិត្តឱ្យយកឱកាសនេះចាកចេញពីកម្ពុជាប្រសិនបើនោះជាបំណងប្រាថ្នារបស់អ្នក។ នៅលើយន្ដហោះនេះមានកៅអីចំនួន ២១០ ហើយយើងចង់ធានាឱ្យច្បាស់ថារាល់កៅអីទាំងអស់ មានអ្នកអង្គុយពេញ ដោយមិនមានកន្លែងទំនេរឡើយ។ កន្លែងអង្គុយនឹងត្រូវបានបម្រុងទុកសម្រាប់អ្នកដែលកក់ទុកមុន តែក៏មានលទ្ធភាពពិសេសសម្រាប់អ្នកដំណើរណាដែលមានបញ្ហាសុខភាពផងដែរ។ អូស្រ្តាលី មិនមានផែនការរៀបចំជើងហោះហើរពិសេសឥតគិតថ្លៃទេ (Charter Flight)។ អ្នកក៏ប្រហែលជាធ្លាប់បានដឹងឮអំពីជើងហោះហើរផ្សេងទៀតដែលអាចនឹងត្រូវធ្វើដោយបុគ្គលឯកជនឬក្រុមហ៊ុនណាមួយ។ ជម្រើសដែលយើងកំពុងគូសបញ្ជាក់ខាងលើនេះ គឺជាការវិវត្តន៍ថ្មីបំផុត និងអាចទទួលបានពីជម្រើសផ្សេងទៀត ហើយមានការគាំទ្រពីរដ្ឋាភិបាលពាក់ព័ន្ធរួចហើយទាក់ទងនឹងការអនុម័តជើងហោះហើរ។ ប្រសិនបើអ្នកមិនអាចឆ្លៀតយកឱកាសនេះអ្នកគួរតែងាកទៅរកជម្រើសហោះហើរបែបពាណិជ្ជកម្មដែលអាចរកបានផ្សេងទៀត (នេះរួមបញ្ចូលទាំងជើងហោះហើរ ANA តាមរយៈប្រទេសជប៉ុនរហូតដល់ថ្ងៃទី ១១ ខែមេសា) ។
ប្រសិនបើអ្នកមានបញ្ហាជាមួយលិខិតឆ្លងដែន ឬប្រសិនបើអ្នកមានសំណួរផ្សេងទៀត សូមទាក់ទងផ្នែកកុងស៊ុលភ្លាមតាមដែលអាចធ្វើបាន។
ដូចគ្នានឹងអ្វីៗទៀតដែរ នៅមានឱកាសតិចតួចខ្លះ ដែលអាចប៉ះពាល់ដល់ការហោះហើរនេះ ប៉ុន្តែយើងនឹងផ្តល់ព័ត៌មានលម្អិតដែលបានបញ្ជាក់ ឱ្យបានឆាប់តាមដែលអាចធ្វើទៅបាន។
ដោយក្តីគោរពរាប់អានពីក្រុមការងារផ្នែកកុងស៊ុល
ស្ថានទូតអូស្ត្រាលី
ផ្លូវលេខ ១៦ បេរដ្ឋសភាជាតិ
ភ្នំពេញប្រទេសកម្ពុជា
+៨៥៥ (០) ២៣ ២១៣ ៤៧០ |
ព័ត៌មានសម្រាប់អ្នកដែលធ្វើដំណើរទៅអូស្ត្រាលីជាមួយសមាជិកគ្រួសារផ្ទាល់ដែលមិនមែនជាពលរដ្ឋអូស្រ្តាលី ឬមិនមែនជាអ្នករស់នៅ អូស្ត្រាលីអចិន្រ្តៃយ៍។
មានករណីលើកលែងមួយចំនួនសម្រាប់សមាជិកគ្រួសារផ្ទាល់របស់ពលរដ្ឋអូស្រ្តាលី ឬអ្នករស់នៅអូស្ត្រាលីអចិន្រ្តៃយ៍ដែលមានបំណង ធ្វើដំណើរ ទៅប្រទេសអូស្ត្រាលីនៅពេលនេះ។ ទោះយ៉ាងនេះក្តី សមាជិកទាំងនោះ នឹងមិនអាចធ្វើដំណើរទៅអូស្ត្រាលីបានទេ បើពួកគេពុំមានទិដ្ឋាការ (Visa) អូស្ត្រាលី និងពុំបានទទួលការលើកលែងនេះ។
សមាជិកគ្រួសារផ្ទាល់ ត្រូវបានគេកំណត់ថាជាប្តី-ប្រពន្ធ ជាដៃគូ (defacto) ជាកូន-ជាអ្នកនៅក្នុងបន្ទុក ឬជាអាណាព្យាបាលស្របច្បាប់។
ប្រសិនបើសមាជិកគ្រួសារផ្ទាល់ណាម្នាក់ មិនទាន់មានទិដ្ឋាការទេនោះ សូមដាក់ពាក្យសុំទិដ្ឋាការតាមអ៊ិនធឺរណេត ដោយប្រើប្រព័ន្ធអនឡាញ ImmiAccount ហើយសូមផ្តល់ភស្តុតាង (ឯកសារពាក់ព័ន្ធ) អំពីទំនាក់ទំនងសម័្ពន្ធភាពជាមួយសមាជិករូបនោះ (ដូចជាសំបុត្រអាពាហ៍ពិពាហ៍ សំបុត្រកំណើត ភស្តុតាងបង្ហាញពីហិរញ្ញវត្ថុរួម និងទ្រព្យសម្បត្តិរួមជាដើម) ។
ប្រសិនបើសមាជិកគ្រួសារផ្ទាល់រូបណា ដែលមានទិដ្ឋាការទៅអូស្ត្រាលី ឬបានទទួលទិដ្ឋាការបណ្តោះអាសន្នរួចហើយ សមាជិករូបនោះ នឹង ត្រូវការស្នើសុំការលើកលែងដោយប្រើ ទម្រង់បែបបទមួយនេះ https://immi.homeaffairs.gov.au/help-support/deteral-forms/online-forms/covid19-enquiry-form។ ការស្នើសុំលើកលែងនេះ មិនអាចសម្រេចបានដោយស្ថានទូតអូស្ត្រាលី នៅភ្នំពេញបានឡើយ ដូចនេះ យើងចាំបាច់ត្រូវ ការ ពេលវេលា បន្ថែម។
សម្គាល់៖ សមាជិកគ្រួសារផ្ទាល់ មិនអាចធ្វើដំណើរទៅអូស្ត្រាលីបានទេដរាបណាសមាជិករូបនោះ កាន់ទិដ្ឋាការអូស្រ្តាលីហើយបានទទួលដំបូន្មាន (ការលើកលែង) ឲ្យធ្វើដំណើរទៅអូស្ត្រាលី។
ប្រសិនបើអ្នកជាពលរដ្ឋអូស្រ្តាលី ឬជាអ្នកមានសិទ្ធិស្នាក់អូស្រ្តាលីអចិន្ត្រៃយ៍ ដែលកំពុងស្វែងរកមធ្យោបាយវិលត្រឡប់ទៅ អូស្ត្រាលី ជាបន្ទាន់ ជាមួយសមាជិកគ្រួសារផ្ទាល់ អ្នកគួរតែដាក់ពាក្យសុំទិដ្ឋាការនិងស្វែងរកការលើកលែងពីការរឹតត្បិតការធ្វើដំណើរ ដល់សមាជិកគ្រួសារអ្នកឥឡូវនេះ។
ព័ត៌មានបន្ថែម សូមផ្ញើអ៊ីមែលមក [email protected] ។